Ex Evangeliō Secundum Lucam

 

2:1 factum est autem in diēbus illīs exiit ēdictum ā Caesare Augustō ut dēscrīberētur ūniversus orbis.

2:2 haec dēscriptiō prīma facta est praeside Syriae Cyrinō;

2:3 et ībant omnēs ut profiterentur singulī in suam cīvitātem.

2:4 ascendit autem et Ioseph ā Galilaea dē cīvitāte Nazareth in Iudaeam civitātem David quae vocātur Bethleem eō quod esset dē domō et familiā David,

2:5 ut profiterētur cum Mariā dēsponsātā sibi uxōre praegnate.

2:6 factum est autem cum essent ibi implētī sunt diēs ut pareret;

2:7 et peperit fīlium suum prīmōgenitum et pannīs eum involvit et reclīnāvit eum

in praesepiō quia nōn erat eīs locus in dīversoriō.

2:8 et pāstōrēs erant in regiōne eādem vigilantēs et custōdientēs vigiliās noctis suprā gregem suum.

2:9 et ecce angelus Dominī stetit iuxtā illōs et clāritās Deī circumfulsit illōs et timuērunt timōre magnō.

2:10 et dīxit illīs angelus: nōlīte timēre, ecce enim evangelizō vōbīs gaudium magnum quod erit omnī populō,

2:11 quia nātus est vōbīs hodiē salvātor quī est Christus Dominus in cīvitāte David;

2:12 et hoc vōbīs signum: inveniētis infantem pannīs involūtum et positum in praesepiō.

2:13 et subitō facta est cum angelō multitūdō militiae caelestis laudantium Deum et dīcentium, 

2:14 glōria in altissimīs Deō et in terrā pāx in hominibus bonae voluntātis.

2:15 et factum est ut discessērunt ab eīs angelī in caelum.  pāstōres loquēbantur ad invīcem, trānseāmus usque Bethleem et videāmus hoc verbum, quod factum est quod fēcit Dominus et ostendit nōbīs.

2:16 et vēnērunt festinantēs et invēnērunt Mariam et Ioseph et infantem positum in praesepiō.

2:17 videntēs autem cognōvērunt de verbō quod dictum erat illīs de puerō hōc.

2:18 et omnēs quī audīvērunt mīrātī sunt et dē hīs quae dicta erant ā pāstōribus ad ipsōs.

2:19 Maria autem cōnservābat omnia verba haec conferēns in corde suō.

2:20 et reversī sunt pāstōres glōrificantēs et laudantēs Deum in omnibus quae audīverant et vīderant sīcut dictum est ad illōs.